Zämefassig vo öisem Träffe 2004

Am nüni het sech's OK im Chelegmeindhus troffe um die letschte Vorbereitige a d'Hand z'näh. Zerscht hets no ä chlini Ufregig gäh, wöu mer ned die einzige si gsi, wo am 4. Septämber im Chelegmeindhus hei wöue es Fescht fire. Aber mer hei dä Sachverhalt de chönne kläre und hei mit de Vorbereitige chönne afo. Tisch und d'Stüehl hei mer umegschobe , bis si am rächte Ort gschtande si. Wo de Priska und Trix no mit der Dekoration si cho und aus parat isch gsi, het's nis aune gfaue und mer hei nis uf ä Nomittag gfröit. Zerscht si mer im Schlüssel no öppis go ässe (die wo hei möge) und hei de, vo dr Gartewirtschaft us, die Erschte gse cho. So gäge die 1, si vor äm Schuelhus Oberdorf de langsam alli iitrudlet. Me het sech begrüesst und sech gfreut, gwüssi Lüüt nach 5 Johr weder z'gseh.
Nach der Begrüessig hei mer vor äm Schuelhus äs paar Gruppeföteli gmacht und si de i 5er-Gruppe ahand vom ne Wettbewärbsfrogeboge dür's Dorf zum Bahnhof spaziert. Nachdäm s'nume Sieger het gäh (Wöu aui dr Bahnhof gfunde hei), si mer de um 2, mit em Stadtomnibus zum Segelflugplatz im Geid z'Oute gfahre. Bem ne zwöite Wettbewärb het me müesse usefinde, wie schwer as s'ganze OK zäme isch. (S'Gwicht weiss eg nümme --- uf jede Fau z'schwär!!..) Planet wär gsi, dass die erschte 3 chöi ä churze Rundflug mit äm ne Seguflüger mache, während die andere bim Apero si. Leider het das nid klappet, wöu kei Pilot isch ome gsi!!!. Nüt deschto trotz het's notürlich ä Sieger(in) gä.

1. Pia Moser-Hüsler
2. Ziehlmann Josef
3. Hodel Urs

Dene 3 gratuliere mer ganz härzlich und hoffe, dass se Fröid a de Büecherguetschine hei gha. Bim richhautige Apèro hei mer ösi trochene Kehle chönne benetze und der "chli Hunger" mit feine Häppli stöue. So um die vieri si mer ufbroche und i Richtig obere Grabe z'Olte abmarschiert. Be däm Spaziergang hei mer's schöne Wätter gnosse und äs isch agregt diskutiert worde.
Um haubi föifi het nis Frou Troller zu nere Stadtfüehrig empfange. Mit vöu Humor und Fachwüsse het si nis dör Oute gfüehrt. Eg dänke, dass ou die paar letschte Skeptiker bis am Schluss ihrne spannende Usfüehrige zuglost hei.
Am sächsi si mer de weder i Stadtomnibus igstege und Richtig Hägedorf gfahre, bis zum katholische Chelegmeindhus. Dört aglangt, hei mer üse Durscht chönne stille und nis chli früsch mache. Be agregte Diskussione hei mer nis langsam ä Tisch gsucht wo mer wei hocke und nis uf's Nachtässe gfröit. Gli druf isch de öises Znacht vorgfahre. Dr mobil Pizzaofe vom Eugen Arnet esch hinderem Chelegmeindhus installiert worde. Gli esch agfüret gsi und es het scho fein afo schmöcke. Äs Salatbüffet und ä huffe feini Zuetate für uf d'Pizza si parat gmacht worde. Zerscht hets als Vorschpies äs feins Fladebrot zum Salot gä und de hei sich die Erschte scho chönne ehri Wunschpizza zämestöue. Die Einte hei bem Astoh plouderet, die Andere hei bi agregte Gspräch ihri Pizza verdröckt und wider Anderi hei gluegt, dass ou z'Flüssige nid z'churz chunt. Als Attraktion het d'Tochter vom Eugen uf Wunsch die Pizze mit em Eiradvelo serviert.Und äs sie ou würklech aui Pizze be dä Bstöuer acho, ohni zerscht am Bode z'ligge! So esch gschlemmeret worde, bis die Büch langsam voll si gsi. Ou dr Pizzaiolo und sini Familie hei sech de ä Pizza gönnt nachdäm se öis bedint hei gha. So isch dr Obe witer fortgschritte, zur Musig vom DJ Zwigu isch d'Stimmig "voll abgange!!...". So um die haubi öufi isch de no s'Desserbüffet itroffe. wider hei mer nis i die chauti Schlacht am Desserbüffet g'stürzt und hei no dr letscht Platz i öisne Mäge gfüut. Gli druf hei de die Erschte dr Heiwäg under d'Füess gno (meh oder weniger sicher)!! Die andere hei sich witer guet unterhalte und d'Vergangeheit, Gägewart oder d'Zuekunft döregnoh. Met dr Zyt hei sich d'Reihe de glichtet und äs par wenigi hei de no gluegt, dass mer ned z'vöu Getränk müesse zrugggäh..!! Mer vom OK hei de scho langsam afo ufrume und si de ou einisch fertig worde. (weiss nöm genau wenn?!?) Erschöpft und zfrede öbere Ablouf vo üsem Träffe si mer de aui heiszue. Eg cha nume no säge: I'm a fifty-niner und eg fröie me scho ufs nöchschte mou.... Ueli